રાજ્યસભામાં બુધવારે પોક્સો સુધારા બિલને પાસ કરવામાં આવ્યું છે, જેમાં ચાઇલ્ડ પોર્નોગ્રાફીને વ્યાખ્યાયિત કરતા બાળકો વિરુદ્ધ અપરાધોમાં મૃત્યુદંડની જોગવાઇ કરવામાં આવી છે. રાજ્યસભામાં યૌન શોષણ અપરાધોની બાળકોને રક્ષણ સુધારા બિલ પર ચર્ચામાં મહિલા અને બાળ વિકાસ મંત્રી સ્મૃતિ ઇરાનીએ જણાવ્યું કે, બાળકો વિરુદ્ધ યૌન અપરાધો અને બળાત્કાર જેમાં મામલાઓમાં ઝડપી સુનવણી માટે કેન્દ્ર સરકારે 1023 વિશેષ ફાસ્ટ ટ્રેક અદાલતોની રચના કરવા મંજૂરી આપી દીધી છે. અત્યાર સુધી 18 રાજ્યોમાં આ પ્રકારની અદાલતોને સ્થાપના માટે મંજૂરી અપાઇ હતી. જેની રચના પાછળ 767 કરોડ રુપિયા ખર્ચ થશે, આ ખર્ચમાં 747 કરોડ રુપિયા કેન્દ્ર સરકાર દ્વારા યોગદાન કરવામાં આવશે.
મહિલા અને બાળ વિકાસ મંત્રીના જવાબ પછી રાજ્યસભામાં પોક્સો સુધારા બિલને પાસ કરવામાં આવ્યું હતું.
દેશમાં વધી રહેલા બાળકો વિરુદ્ધ શારિરીક શોષણના ગુનાઓ પર ઇરાનીએ જણાવ્યું કે, સરકાર તેની અલગ-અલગ એજન્સીઓની મદદથી આ મામલે પ્રોત્સાહન આપી રહી છે કે બાળકો તેમની વિરુદ્ધ થતા યૌન અપરાધો વિશે નિડરતાથી ફરિયાદ કરે અને સ્વજનોને જણાવી શકે. તેમણે એમ પણ જણાવ્યું કે બાળકીઓ વિરુદ્ધ થતા શારિરીક ગુનાઓની ફરિયાદ નોંધાવવામાં આવે છે, પરંતુ છોકરાઓ વિરુદ્ધ થતા ગુનાઓની ફરિયાદ થતી નથી. તેમણે જણાવ્યું કે, સમાજમાં હવે પુરુષોએ પણ આ પ્રકારના ગુનાઓનો ઉલ્લેખ કરવામાં સંકોચ ન અનુભવવો જોઇએ.
સ્મૃતિ ઇરાનીએ જણાવ્યું કે વર્તમાન કાયદામાં બાળકો વિરુદ્ધ યૌન અપરાધોના મામલાઓમાં 20 વર્ષથી આજીવન કેદની સજાની અને તેથી વધારે ગંભીર મામલાઓમાં મૃત્યપદંડની જોગવાઇ છે. આ સિવાય બધા જ રાજ્યોમાં સીનિયર નોડલ પોલીસ અધિકારીની નિમણૂક પણ કરવામાં આવી છે.
તેમણે જણાવ્યું કે મૂળ કાયદા મુજબ બાળ યૌન અપરાધોમાં ફરિયાદ નોંધવાથી બે મહિનાની અંદર તપાસ પૂરી કરી એક વર્ષની અંદર કેસ પૂરો કરવાની જોગવાઇ છે. ઇરાની મુજબ સરકારે રાષ્ટ્રીય ડેટા તૈયાર કર્યો છે, જે હેઠલ દેશમાં આવા છ લાખથી વધારે અપરાધીઓ છે. જો કોઇ આ પ્રકારની વ્યક્તિને રોજગાર પૂરો પાડે છે તો, તે વ્યક્તિ સંબંધિત માહિતી લેવામાં મદદ મળશે.
