કંડલા નજીક મીઠા પોર્ટમાં બાઇક અથડાવવા મુદ્દે બે જૂથ વચ્ચે હિંસક અથડામણમાં બે યુવકની હત્યા કરી દેવામાં આવી છે. ધિંગાણામાં 10થી વધુ લોકો ઈજાગ્રસ્ત થયા છે. બંને મૃતકોને હોસ્પિટલમાં સારવાર મળે તે પહેલા જ દમ તોડ્યો હતો. ઘાયલોને આદિપુરની જૈન સેવા સમિતિ અને રામબાગ હોસ્પિટલમાં સારવાર માટે ખસેડવામાં આવ્યા છે. ઘર્ષણના પગલે ઉચ્ચ અધિકારીઓ સહિતનો પોલીસ કાફલો ઘટનાસ્થળે દોડી આવ્યો હતો.
ઘટનાસ્થળે ચૂસ્ત પોલીસ બંદોબસ્ત
અથડામણમાં બે લોકોની હત્યા બાદ પૂર્વ કચ્છ એસપી પરીક્ષિતા રાઠોડ અને અન્ય ઉચ્ચ અધિકારીઓનો કાફલો ઘટનાસ્થળે દોડી આવ્યો હતો. ઘટનાસ્થળે હાલ લોંખડી પોલીસ બંદોબસ્ત ગોઠવી દેવાયો છે.
એક સાથે બે યુવકની હત્યા
મળતી માહિતી મુજબ આજે બપોરે મીઠા પોર્ટમાં બાઇક અથડાવવા મુદ્દે એક જ કોમના યુવાનો સામસામે આવી ગયા હતા. બોલાચાલી ઉગ્ર બનતા હિંસક ધિંગાણું ખેલાયું હતું. જેમાં મામદ મુદરાણી અને દાઉદ ઈસ્માઇલ નામના બે યુવકોની છરીના ઘા મારીને હત્યા કરી દેવાઈ હતી.
