Women T20-WCની પહેલી મેચમાં ભારતીય મહિલા ક્રિકેટ ટીમે ઓસ્ટ્રેલિયાને હરાવીને સફળ શરુઆત કરી છે. પ્રથમ બેટિંગ કરતા ભારતે ઓસ્ટ્રેલિયાને 133નો લક્ષ્યાંક આપ્યો હતો. પરંતુ ઓસ્ટ્રેલિયન ટીમ 19.5 ઓવરમાં 115 રન બનાવી ઓલઆઉટ થઇ જતાં ભારતનો 17 રને વિજય થયો હતો. આ મેચ ઓસ્ટ્રેલિયાના સિડની ખાતે રમાઇ હતી.
ભારતની જીત માટે શ્રેષ્ઠ પ્રદર્શન કરનાર પૂનમ યાદવે પ્રભાવશાળી બોલિંગ કરતા 19 રન આપી મહત્વની ચાર વિકેટ લીધી હતી. પૂનમને સાથ આપનાર શિખા પાંડેએ 3.5 ઓવરમાં 14 રન આપી ત્રણ વિકેટ ઝડપી હતી.
133 રનના લક્ષ્યાંકનો પીછો કરતી ઓસ્ટ્રેલિયા ટીમની ખરાબ શરુઆત રહી હતી. હેલી અને બેથે વચ્ચે પહેલી વિકેટ માટે 32 રનની ભાગીદારી નોંધાવી હતી પરંતુ શિખા પાંડેએ ટીમને પહેલી સફળતા અપાવી હતી જે પછી ઓસ્ટ્રેલિયાની ટીમ રમતમાં પાછી ન ફરી શકી. ઓસ્ટ્રેલિયાએ 76 રને ત્રણ વિકેટ ગુમાવી દીધી હતી. ઓસ્ટ્રેલિયાની ઓપનર હેલીએ 35 બોલમાં 51 રનની ઇનિંગ રમી હતી, જે પછી બેટ્સમેન ગાર્ડનર ટીમ માટે 34 રન જોડી શકી હતી.
ટોસ જીતીને ઓસ્ટ્રેલિયાની ટીમે ભારતને પહેલા બેટિંગ કરવા આમંત્રણ આપ્યું હતું, જેમાં 20 ઓવર રમતા ભારતે 132 રન બનાવ્યા હતા. ટીમને આ સ્કોર સુધી પહોંચાડવામાં દીપ્તી શર્માનું નોંધનીય યોગદાન રહ્યું હતું. દીપ્તી એક રનથી જ તેની અર્ધસદી ચૂકી હતી. પોતોનો પહેલો વિશ્વ કપ રમી રહેલી 15 વર્ષની શેફાલી વર્માએ શ્રેષ્ઠ પ્રદર્શન દાખવતા 15 બોલમાં પાંચ ચોક્કા અને એક સિક્સની મદદથી 29 રન બનાવ્યા હતા.
