એક સમયે એક જ મંચ પર સાથે હાથ મિલાવી મોદી સરકાર વિરુદ્ધ મહાગઠબંધનમાં જોડાઇ રાજકીય કારકિર્દીની શરુઆત કરનાર હાર્દિક પટેલ અને અલ્પેશ ઠાકોર વચ્ચે હવે તિરાડ પડી હોવાના સંકેત મળી રહ્યા છે. તાજેતરમાં કોંગ્રેસ છોડનાર અલ્પેશ ઠાકોર પર હાર્દિક પટેલે કોંગ્રેસ દ્વારા અપાયેલ માન અને સત્તા ન સંભાળી શકવાનો આરોપ લગાવ્યો છે.
હાર્દિક પટેલના અલ્પેશ ઠાકોર વિરુદ્ધ અને કોંગ્રેસની તરફેણમાં કરાયેલ નિવેદન મુજબ અલ્પેશ ઠાકોરે વિતેલા કેટલાક સમયથી બ્લેમ ગેમ રમવાની શરુ કરી દીધી હતી. કોંગ્રેસે તેમને એટલું માન અને સત્તા આપી હતી કે તેઓ સંભાળી શક્યા નહી.
આ દરમિયાન હાર્દિક પટેલે ભાજપા પર આકરા પ્રહારો કરતા જણાવ્યું કે, હું લોકસભા ચૂંટણી ન લડી શકુ તે માટે ભાજપાએ ઘણા પ્રયત્ન કર્યા, હું કોર્ટના નિર્ણયને માન આપું છું. ભાજપાના વકીલોએ મને રોકવા માટે એડી ચોટીનું જોર લગાવ્યું જેના કારણે હું લોકસભા ચૂંટણી લડી શકીશ નહી. કોંગ્રેસ મને સંસદમાં મોકલવા માંગતી હતી. હું 25 વર્ષનો યુવક છું અને હજુ ઘણી ચૂંટણીઓ આવશે.
ઉલ્લેખનીય છે કે સુપ્રીમ કોર્ટ દ્વારા હાર્દિક પટેલને લોકસભા ચૂંટણી લડવા માટે અયોગ્ય જાહેર કરવામાં આવ્યા હતા. જેના કારણે તેઓ ચૂંટણી લડી શકે તેમ નથી.
