કેબિનેટની બેઠકમાં બુધવારે મહત્વનો નિર્ણય કરવામાં આવ્યો છે. કેન્દ્રીય મંત્રી પ્રકાશ જાવડેકરે નિર્ણયની માહિતી આપતા જણાવ્યું કે 11 લાખ 52 હજાર રેલવે કર્મચારીઓને આ વર્ષે 78 દિવસના વેતન બરાબર બોનસ આપવામાં આવશે. તેની પર 2,000 કરોડ રૂપિયાનો ખર્ચ આવશે. જાવડેકરે કહ્યું કે કર્મચારીઓની ઉત્પાદકતા અને મનોબળને ધ્યાનમાં રાખીને નિર્ણય લેવામાં આવ્યો છે. છેલ્લા 6 વર્ષથી રેલવે કર્મચારીઓને બોનસ આપવામાં આવે છે.
ઈ-સિગરેટ પર પ્રતિબંધનો નિર્ણય યોગ્ય સમય પર લેવામાં આવ્યોઃ સરકાર
નાણા મંત્રી નિર્મલા સીતારમણે જણાવ્યુ કે કેબિનેટે ઈ-સિગરેટ પર પ્રતિબંધ લગાવવાને મંજૂરી આપી દીધી છે. તેના ઉત્પાદન, ઈમ્પોર્ટ-એક્સપોર્ટ, વેચાણ, વિતરણ અને જાહેરાત પર પ્રતિબંધ લગાવવામાં આવશે. સીતારમણે જણાવ્યું કે રિપોર્ટ્સના જણાવ્યા પ્રમાણે ઈ-સિગરેટની 400 બ્રાન્ડ અને 150 ફલેવર છે. તેમાંથી કોઈ પણ ભારતમાં બનતી નથી. સરકારનું કહેવું છે કે યુવાઓ અને બાળકોને ઈ-સિગરેટની લતના ખતરાથી બચાવવા માટે યોગ્ય સમય પર આ નિર્ણય કરવામાં આવ્યો છે. ભારતમાં ઈ-સિગરેટનું વેચાણ હાલ ઓછું છે, પરંતુ ધીરે-ધીરે વધી રહી હતી.
મીડિયા રિપોર્ટ્સના જણાવ્યા પ્રમાણે ઈ-સિગરેટ પર બેનના અધ્યાદેશના ડ્રાફટમાં સ્વાસ્થ્ય મંત્રાલયે પ્રસ્તાવ મૂક્યો છે કે પ્રથમ વાર નિયમ તોડનારને 1 વર્ષ સુધીની જેલ થાય અને 1 લાખ રૂપિયાનો દંડ થાય. બીજી વખત ઉલ્લંઘન કરનારને 3 વર્ષ સુધીની જેલ અને 5 લાખ રૂપિયા સુધીનો દંડ ફટકારવામાં આવ્યો છે.
ઈ-સિગરેટ શું છે ?
ઈલેકટ્રોનિક સિગરેટ એક બેટરી ડિવાઈસ હોય છે. તેના દ્વારા નિકોટિનના સોલ્યુશનને શ્વાસની સાથે ખેંચવામાં આવે છે. ઈ-સિગરેટને ન્યુયોર્કમાં પણ બેન કરવામાં આવી છે.
