ક્રિકેટ એક એવી રમત છે, જેમાં દર વર્ષે કાંઈકને કાંઈ નવું આવતું જાય છે. ઘણા સામાન્ય બદલાવ હોય છે તો અમુક બદલાવ વર્ષો સુધી યાદ રહે છે. જેમ કે, થોડા વર્ષો પહેલાં આવેલો સુપર સબ નિયમ, જે ક્યારે ખતમ થઈ ગયો એ તમને ખ્યાલ જ નહીં રહ્યો હોય. પણ અમુક બદલાવ આખા ખેલનો નકશો બદલી દે છે. ક્રિકેટમાં વનડે અને ટી20 ફોર્મેટ આવા જ બદલાવ હતા. અને હવે આ બદલાવમાં 100 બોલ ક્રિકેટ પણ આવવા જઈ રહ્યું છે.
ઈન્ટરનેશનલ ક્રિકેટની શરૂઆત 1877માં થઈ હતી. આ વર્ષ ઈંગ્લેન્ડ અને ઓસ્ટ્રેલિયા વચ્ચે પહેલી ટેસ્ટ મેચ રમાઈ હતી. લગભગ 94 વર્ષ સુધી ક્રિકેટનું આ ફોર્મેટ રહ્યું હતું. તે બાદ વન ડે ક્રિકેટ આવ્યું અને 21મી સદીમાં ટી 20 ક્રિકેટે પોતાની જગ્યા બનાવી. જોગાનુજોગ ક્રિકેટના જન્મદાતા ઈંગ્લેન્ડ ટેસ્ટ મેચની જેમ પહેલી વનડે અને પહેલી ટી20 ઈન્ટનેશનલ મેચમાં સામેલ હતું. અને હવે તે જ ઈંગ્લેન્ડ 100 બોલ ક્રિકેટ લઈને આવી રહ્યું છે. એક રિપોર્ટ પ્રમાણે 3 ઓક્ટોબરે ટીમોની ઘોષણા અને ખેલાડીઓના ચયનની પ્રક્રિયા પણ શરૂ થઈ શકે છે.
આમ તો 100 બોલ ક્રિકેટ ઘરેલું ક્લબ પહેલાંથી રમી રહ્યા છે. પણ હવે ઈંગ્લેન્ડ અને વેલ્સ ક્રિકેટ ક્લબ તેને મોટા પાયે લઈ જવા માટે નિર્ણય કર્યો છે. ઈંગ્લેન્ડ હવે 100 બોલ ક્રિકેટને ટી20ની જેમ લોકપ્રિય બનાવવા ઈચ્છે છે. અને તેણે પોતાના દેશમાં આઈપીએલની જેમ 100 બોલ ક્રિકેટની લીગ કરાવવાનો નિર્ણય કર્યો છે. જેમાં દુનિયાભરના દિગ્ગજ ખેલાડીઓ જોવા મળી શકે છે.
100 બોલ ક્રિકેટના 10 નિયમોઃ
– આ ફોર્મેટમાં દરેક ટીમ 100 બોલ રમશે. મેચમાં કુલ 200 બોલ ફેંકવામાં આવશે.
– આ ફોર્મેટમાં એક ઓવર 6 બોલની નહીં હોય.
– એક બોલર સતત 10 કે 5-5 બોલના બ્રેકઅપમાં બોલિંગ કરશે.
– એક બોલર વધારેમાં વધારે 20 બોલ નાખશે. એટલે કે, મેચમાં ઓછામાં ઓછા 5 બોલરની જરૂર પડશે.
– બેટ્સમેન 10 બોલ બાદ પોતાની ક્રિઝ ચેન્જ કરશે. ટેસ્ટ, વનડે અને ટી20 ફોર્મેટમાં દરેક ઓવર બાદ ક્રિઝ ચેન્જ થાય છે.
– બોલિંગ ટીમને અઢી મિનિટનો સ્ટ્રેટેજિક ટાઈમ મળશે.
– દરેક ટીમ માટે 25 બોલનો પાવરપ્લે હશે.
– પાવરપ્લે દરમિયાન 30 યાર્ડના સર્કલની બહાર ફક્ત 2 ફિલ્ડર રહેશે.
– ટીમ ટાઈમઆઉટ કોલ કરવામાં સક્ષમ હશે. આઈપીએલમાં પણ આ નિયમ લાગુ છે.
– તેના આયોજકો સરળ સ્કોરબોર્ડ બનાવવાની પણ વાત કરી છે. પણ તેના વિશે હજુ વધારે જણાવવામાં આવ્યું નથી.
