વડોદરાના નવલખી મેદાનમાં 15 દિવસ પહેલાં તરુણી ઉપર ‘ગેંગ રેપ’ના બે આરોપીને અમદાવાદ ક્રાઈમ બ્રાન્ચે ૪૮ કલાકમાં જ વડોદરાથી ઝડપી લીધા છે. તરસાલી વિસ્તારમાંથી કિશન માથાસુરિયા અને જશા સોલંકી નામના બે યુવકને ઝડપી લઈ પ્રાથમિક પૂછપરછ બાદ વડોદરા પોલીસને સોંપી દેવાયા છે. ગત તા. ૨૮ નવેમ્બરે રાતે સાડા આઠ વાગ્યાના અરસામાં તરુણી તેના મિત્ર સાથે નવલખી મેદાનમાં બેઠી હતી. આ સમયે બન્ને આરોપી દંડા લઈને ગયા હતા અને પ્રેમીને ભગાડી દીધા પછી તરુણી ઉપર બે-બે વખત બળાત્કાર ગુજાર્યો હતો.
ફૂગ્ગા વેચવાના બહાને ચોરી કરતાં બન્ને આરોપીને ઘટનાસ્થળથી છ કિ.મી. દૂર તરસાલી વિસ્તારના ઝૂંપડામાંથી ઝડપી શનિવારે રાત્રે અમદાવાદ ક્રાઈમ બ્રાન્ચ ખાતે લવાયા હતા.
અત્યંત સંવેદનાથી ગુનાનો ભેદ ઉકેલવા ટેકનિકલ પુરાવા, હ્યુમન ઈન્ટેલિજન્સ, સીસીટીવી સર્વેલન્સ અને બનાવની જગ્યા આસપાસમાં રહેતા લોકોની પૂછપરછ, તપાસ કરવામાં આવી હતી. ક્રાઈમ બ્રાન્ચને માહિતી મળતાં ક્રાઈમ બ્રાન્ચની ટીમો નિશ્ચિત ચહેરાવાળા શખ્સોને શોધવા તરસાલી વિસ્તારના ઝૂંપડા ખૂંદવા લાગી હતી. તરસાલીના ગંગાસાગર રોડ ઉપર ગુરુદ્વારા નજીક ફૂટપાથ પર રહેતા કિશન કાળુભાઈ માથાસુરિયા (ઉ.વ. ૨૮) ઝડપાયો તે સાથે જ તેણે ગુનો કબૂલી લીધો હતો. કિશને આપેલી માહિતીના આધારે ‘ગેંગ રેપ’માં તેના સાગરિત, તરસાલી ચોકડી પાસે રાજાનંદ બિલ્ડિંગ નજીક છાપરામાં રહેતા જશા વનરાજ સોલંકી (ઉ.વ. ૨૧)ને ઝડપી લેવાયો હતો. બન્ને આરોપીઓ ફૂગ્ગા વેચવાના બહાને લગ્નસ્થળો અથવા તો જાહેર ફરવાના સ્થળોએ ફરીને ચોરીના ગુના આચરતા હતા.
તા. 28ની રાતે નવલખી મેદાનમાં એકાંત મળતાં જ ‘ગેંગ રેપ’ની જંગાલિયતભર્યું કૃત્ય આચર્યા પછી બન્ને આરોપી વડોદરામાં જ રહેતા હતા અને જાણે કંઈ જ બન્યું ન હોય તેમ જિંદગી જીવી રહ્યાં હતાં.
વડોદરાના રાવપુરા પોલીસ સ્ટેશનમાં નોંધાયેલા ગેંગ રેપના ગુનાની તપાસ વડોદરા ક્રાઈમ બ્રાન્ચને સોંપાઈ હતી. આરોપીના સ્કેચ બનાવીને વડોદરા પોલીસની ટૂકડીઓએ પખવાડિયાથી રાત-દિવસ તપાસનો દોર ચાલુ રાખી ઘટનાસ્થળ આસપાસના ચાર-પાંચ કિ.મી. વિસ્તારમાં 5000થી વધુ લોકોને તપાસ્યા હતા. પણ, અમદાવાદ ક્રાઈમ બ્રાન્ચની ટીમોએ વડોદરામાં સક્રિય બનીને તપાસનો વ્યાપ થોડો વધારીને બે દિવસમાં જ ‘ગેંગ રેપ’ કેસ ઉકેલી નાંખ્યો.
ગત તા. ૨૮ નવેમ્બરે નવલખી મેદાનના અંદરના ભાગે વીએમસી દ્વારા બનાવાયેલા કૃત્રિમ તળાવ નજીક લાકડાનો ધોકો ફટકારી સગીર પ્રેમીને ગાળો દઇને જાનથી મારી નાખવાની ધમકી આપીને ભગાડી દીધો હતો. આ પછી સગીરાને મેદાનના અંતરીયાળ ભાગમાં વધુ અંધારામાં લઇને જઇને બન્ને આરોપીએ બે-બે વખત બળાત્કાર ગુજાર્યો હતો. આ ઘટના અંગેનો મેસેજ સોશિયલ મીડિયા પર ફરતો થતાં વડોદરાના રાવપુરા અને દાંડીયાબજારના કેટલાક વિસ્તારમાં વાતાવરણ તંગ બન્યું હતુ. ગૃહરાજ્ય મંત્રી જાડેજાએ વડોદરાની મુલાકાત લીધા પછી બળાત્કારીઓને ઝડપી લેવા ખાતરી અપાયાના કલાકોમાં જ ઝડપાયેલા બન્ને આરોપીએ ગુનો કબૂલી અમદાવાદ ક્રાઈમ બ્રાન્ચ સમક્ષ ઘટનાક્રમ વર્ણવ્યો હતો.
