પાકિસ્તાનની જેલમાંથી પરત ફરેલા વિંગ કમાન્ડર અભિનંદન વર્થમાનના નામથી એક તસવીર સોશિયલ મીડિયામાં વાઇરલ થઈ છે. જેમાં અભિનંદન જેવી જ દેખાતી એક વ્યક્તિ કૅપ અને ચશ્માં પહેરી, ગળામાં ભાજપના ખેસ સાથે જઈ રહી છે. જે લોકોએ સોશિયલ મીડિયા પર આ તસવીરને શૅર કરી રહ્યા છે, તેઓ વિંગ કમાન્ડર દ્વારા મોદીને સર્મથન આપવાનો દાવો કરી રહ્યા છે. લોકો આ તસવીર સાથે એવો સંદેશો શૅર કરી રહ્યા છે, “વિંગ કમાન્ડર અભિનંદને ખુલ્લેઆમ ભાજપને સમર્થન કર્યું છે અને મત પણ આપ્યો છે. “
અભિનંદનના નામે જેમની તસવીર વાઇરલ થઈ છે તે ગુજરાતમાં મોદીની સભામાં જોવા મળ્યા ‘નમો ભક્ત’ અને ‘મોદી સેના’ જેવા જમણેરી વલણ ધરાવતા ઘણા મોટા ફેસબુક ગ્રૂપ્સમાં આ તસવીરને શૅર કરવામાં આવી છે. આ વાઇરલ તસવીર ગુજરાતની છે, જેમાં તસવીરની પાછળ ગુજરાતી ભાષામાં ‘ઢોસા સેન્ટર’ અને ‘સમોસા’ પણ લખેલું દેખાય છે. ગુજરાતમાં મતદાન થયું તે પહેલાં જ આ તસવીર વાઇરલ થઈ ગઈ હતી. જે વ્યક્તિ વિંગ કમાન્ડર અભિનંદન જેવી જ દેખાય છે, તે 17 એપ્રિલના રોજ મોદીની આણંદની સભામાં પણ જોવા મળી હતી. મોદીની સભામાં બીબીસી સાથે વાત કરતાં આ વાઇરલ તસવીર તેમની જ હોવાનું તેમણે સ્વીકાર્યું હતું.
