ભારતના ટોચના કુસ્તીબાજ બજરંગ પુનિયાએ શાનદાર દેખાવ જારી રાખતાં રશિયામાં યોજાયેલી અલી અલીયેવ કુસ્તી ટુર્નામેન્ટમાં ગોલ્ડ મેડલ જીતી લીધો હતો. બજંરગે ફ્રિસ્ટાઈલ કુસ્તીની ૬૫ કિગ્રા વજન વર્ગની ઈવેન્ટમાં આ સફળતા મેળવી હતી. તાજેતરમાં જ તેણે ચીનમાં યોજાયેલી એશિયન કુસ્તી ચેમ્પિયનશીપ જીતી હતી અને ત્યાર બાદ તેણે આ સફળતા હાંસલ કરી હતી.
રશિયાના કાસ્પીસ્કમાં રમાયેલી અલી અલીયેવ ટુર્નામેન્ટની ફાઇનલમાં બજરંગનો સામનો રશિયાના જ વિક્ટર રાસાડિન સામે થયો હતો. હાઈવોલ્ટેજ મુકાબલામાં બજરંગની શરૃઆત સરેરાશ રહી હતી અને એક તબક્કે તે ૦-૫ થી પાછળ ફેંકાઈ ગયો હતો. જોકે ત્યાર બાદ તેણે જબરજસ્ત પુનરાગમન કરતાં આખરે ૧૩-૮થી બાજી મારી હતી.
નોંધપાત્ર છે કે, આ બંને કુસ્તીબાજો વર્ષ ૨૦૧૭માં ડાન કોલોવ ખાતેની ચેમ્પિયનશીપની ફાઇનલમાં પણ આમને-સામને ટકરાયા હતા, જેમાં પણ બજરંગ જ વિજેતા બન્યો હતો. જોકે બલ્ગેરિયાના બોરિસ નોવાચકોવ ખાતે રમાયેલી ફાઈનલમાં બજરંગને રનર્સઅપ ટાઈટલથી સંતોષ માનવો પડયો હતો.
