રાજકોટના પ્રાણી ઉદ્યાનમાં હવે ચાર નાના સફેદ બાળવાઘ જાહેરમાં આવી ગયા છે. માતા સાથે ગેલ કરતાં બચ્ચાં ટાઇગરને જોવા લોકો આવી રહ્યા છે. બાળવાઘના ગેલ જોઈ લોકો ખૂબ આનંદિત થઈ ૨હ્યા છે.
રાજકોટ પ્રાણીઉદ્યાન ખાતે બીજી એપ્રિલ ૨૦૧૯ના રોજ વહેલી સવારે સફેદ વાઘણ ‘ગાયત્ર’એ સફેદ વાઘ નર ‘દિવાકર’ સાથેના સંવનનથી ચાર સફેદ વાઘબાળ (નર-૦૨, માદા-૦૨)ને જન્મ આપ્યો હતો. આ ચાર બચ્ચાઓ પૈકી એક બચ્ચુ નરનો ૨૪કલાક પછી જન્મ થયો હતો. જે ખૂબ જ અશક્ત હતો અને તેનું વજન સામન્ય કરતા ઓછું હતું. આથી ખાસ તકેદારી રાખીને બોટલ ફીડીંગ કરાવી તેનો સફળતા પૂર્વક ઉછેર કરવામાં આવ્યો છે.
ઝૂ ઓથોરિટીના જણાવ્યા પ્રમાણે, હાલ આ બચ્ચાઓની ઉંમર ૩.૫ માસથી વધુ થઇ ગઈ છે. આથી મુલાકાતીઓ માટે પ્રદર્શિત કરવાનું શરૂ કરવામાં આવ્યું છે. બચ્ચાઓને હરવા-ફરવા માટે કુદરતી વિશાળ એરીયા મળતા માતા સાથે બચ્ચાઓ દોડા-દોડી અને ખેલકુદ કરતા જોઇને મુલાકાતીઓ આનંદિત થાય છે.
અગાઉ ઝૂ ખાતે વર્ષ ૨૦૧૫માં આ જ સફેદ વાઘણ ‘ગાયત્રી’એ પ્રથમ વખત સફેદ વાઘ નર ‘દિવાકર’ સાથેના સંવનનથી ચાર સફેદ વાઘબાળને જન્મ આપ્યો હતો. જે તમામ વાઘબાળ હાલ પુખ્ત થઈ ગયા છે અને વન્ય પ્રાણી વિનીમય હેઠળ ભારતના અન્ય ઝૂને આપી શકાશે.
