આજે કોંગ્રેસ વર્કિંગ કમિટી (સીડબ્લ્યૂસી)ની બેઠક મળી હતી. જો કે પાર્ટી અધ્યક્ષના નામની જાહેરાત થવાને બદલે કૉંગ્રેસ વર્કિંગ કમિટીએ પ્રમુખપદનો નિર્ણય અદ્ધરતાલ લટકાવ્યો છે. જ્યારે સોનિયા ગાંધીને કાર્યકારી અધ્યક્ષ બનાવાયા છે. બેઠકમાં કોંગ્રેસ અધ્યક્ષ પદેથી રાહુલ ગાંધીના રાજીનામાનો સ્વીકાર કરવામાં આવ્યો હતો. બેઠક બાદ રાહુલ ગાંધીએ કહ્યું કે કાશ્મીરમાં હિંસાના અહેવાલ છે. વડાપ્રધાન મોદી જણાવે કે કાશ્મીરમાં શું થઇ રહ્યું છે. કાશ્મીરની સ્થિતિને પગલે કૉંગ્રેસ વર્કિંગ કમિટીએ પ્રમુખપદ મુદ્દે નિર્ણય કરવાનું હાલ પુરતું મુલતવી રાખ્યું છે.
કાશ્મીરમાં આવી કોઇ ઘટના બની નથી-આઇજીપી
બીજી તરફ કાશ્મીરના આઇજીપી એેસ.પી. પાનીએ જણાવ્યું કે કેટલાક આંતરરાષ્ટ્રીય મીડિયામાં કાશ્મીરમાં ગોળીબારના જે અહેવાલ આવ્યા છે તે ખોટા છે. કાશ્મીરમાં આવી કોઇ ઘટના બની નથી અને છેલ્લા એક સપ્તાહથી શાંતિ સ્થપાયેલી છે.
રાહુલ ગાંધીએ ફરી અધ્યક્ષ બનવાનો ઈનકાર કર્યો
આ પહેલા શનિવારે સવારે બેઠક શરૂ થતાં જ દરેક નેતાઓએ એક જ સૂરમાં ફરી એક વાર રાહુલ ગાંધી અધ્યક્ષ પદ પર રહેવાની અપીલ કરી હતી. બેઠકમાં એવું પણ કહેવામાં આવ્યું હતું કે, રાહુલ ગાંધી વગર પાર્ટી કેવી રીતે ચાલશે? જોકે રાહુલે ફરી આ પદ પર રહેવાનો ઈનકાર કરી દીધો હતો.
શરૂઆતમાં બેઠકમાં સોનિયા-રાહુલ ગાંધી પાર્ટી કાર્યાલયમાં હાજર હતા. ત્યારપછી તેઓ જતા રહ્યા હતા. સોનિયા ગાંધીએ કહ્યું, હું અને રાહુલ અધ્યક્ષ પદ માટે ચર્ચા-વિચારણામાં હાજર નહીં રહીએ. નવા અધ્યક્ષની ચર્ચા માટે સીડબ્લ્યૂસીના પાંચ સભ્યોને પાંચ હિસ્સામાં વહેંચી દેવામાં આવ્યા હતાં. તેઓ દરેક રાજ્યથી આવેલા નેતાઓ સાથે વાત કરશે.મુકુલ વાસનિક અધ્યક્ષપદની રેસમાં સૌથી આગળ છે. અધીર રંજને કહ્યું હતું કે રાતે 9 વાગ્યા સુધી આ અંગે નિર્ણય આવી જશે.
સૂત્રોના જણાવ્યા પ્રમાણે ગાંધી પરિવાર મધ્ય આયુ વર્ગના કોઈ વ્યક્તિને કોંગ્રેસના વચગાળાના અધ્યક્ષ તરીકે પસંદ કરી શકે છે જેને સંગઠન ચલાવવાનો અનુભવ હોય. આ અંદાજ પ્રમાણે મુકુલ વાસનિક વચગાળાના અધ્યક્ષ તરીકે તેમના પ્રતિસ્પર્ધી સુશીલ શિંદે અને મલ્લિકાર્જુન ખડગે કરતાં આગળ નીકળી જાય છે. મુકુલ વાસનિક ઘણાં લાંબા સમયથી કોંગ્રસ મહાસચિવ તરીકે કાર્યરત રહ્યા છે. તે સિવાય મુકુલ વાસનિક રાજીવ ગાંધી ફાઉન્ડેશનના સભ્ય પણ છે. તેનાથી સ્પષ્ટ થાય છે કે, તેઓ ગાંધી પરિવારની ખૂબ નજીક છે.
25 મેના રોજ રાહુલ ગાંધીએ રાજીનામું આપ્યું હતું
રાહુલ ગાંધી તરફથી પહેલાં જ કહેવામાં આવ્યું છે કે, અધ્યક્ષની પસંદગી કરવામાં કોઈ પણ પ્રકારની ચિંતા કરવાની જરૂર નથી. રાહુલે કહ્યું હતું કે, અધ્યક્ષ પસંદ કરવા માટે કોંગ્રેસને પ્રેશરમાં જોઈને સારુ લાગી રહ્યું છે. આ જ એક વાત છે જે પાર્ટીને સુધારવામાં સફળ રહેશે. રાહુલે લોકસભા ચૂંટણીના પરિણામ પછી 25 મેના રોજ અધ્યક્ષ પદ પરથી રાજીનામું આપ્યું હતું.
પાર્ટી મહાસચિવ રાજ્યના નેતાઓ સાથે ચર્ચા કરશે
સૂત્રોમાં જણાવ્યા પ્રમાણે બેઠકમાં કોંગ્રેસ કમિટીના પ્રમુખ, વિભાગ પ્રમુખ, યૂનિટ પ્રમુખ સહિત અન્ય નેતા પણ હાજર રહેશે. પાર્ટી મહાસચિવને કહેવામાં આવ્યું છે કે, પ્રદેશ કોંગ્રેસ કિમટી, કોંગ્રેસ ધારાસભ્ય કમિટી, વિભાગ પ્રમુખ, યૂનિટ પ્રમુખથી અલગ અલગ આ મુદ્દા પર ચર્ચા કરશે.
CWC નિર્ણય લેશે: વેણુગોપાલ
કોંગ્રેસ મહાસચિવ કેસી વેણુગોપાલે શુક્રવારે કહ્યું કે, શનિવારે કોંગ્રેસ કાર્યસમિતિની બેઠક થશે. તેમાં પાર્ટીના નવા અધ્યક્ષ વિશે વિવિધ નેતાઓ સાથે ઉંડાણપૂર્વક ચર્ચા થશે. તેમાં કોંગ્રેસ કમિટીના દરેક અધ્યક્ષ, ઓલ ઈન્ડિયા કોંગ્રેસ કમિટીના સચિવ અને દરેક સાંસદ ભાગ લેશે. સીડબ્લ્યૂસી નિર્ણય લેશે.
નવા અધ્યક્ષ, જે દરેકને સાથે લઈને ચાલે: સિંઘવી
આ પહેલાં સિંઘવીએ કહ્યું હતું કે, બેઠકમાં એવા વ્યક્તિની પસંદગી થવી જોઈએ જે સૌને સાથે લઈને ચાલવાની યોગ્યતા ધરાવતો હોય. જે પ્રમાણે વેટિકનમાં ઉત્તરાધિકારીની પસંદગી એક બંધ રૂમમાં થઈ જાય છે તે રીતે કોંગ્રેસ અધ્યક્ષની પસંદગી પણ થઈ જવી જોઈએ.
ઘણાં નેતાઓએ પ્રિયંકાને અધ્યક્ષ બનાવવાની વાત કરી
કોંગ્રેસના સીનિયર નેતા કર્ણ સિંહે કહ્યું કે, જો પ્રિયંકા પાર્ટી અધ્યક્ષ બને તો તેઓ કેડરમાં વધારે જુસ્સો ભરી શકે તેમ છે. તેમનામાં લોકોને એકજૂથ કરવાની તાકાત છે. નેતૃત્વ નક્કી કરવામાં મોડુ થવાથી પાર્ટીને નુકસાન થશે. પંજાબના મુખ્યમંત્રી કેપ્ટન અમરિંદર સિંહે કહ્યું હતું કે, પાર્ટીની કમાન કોઈ યુવા નેતાના હાથમાં આપવી જોઈએ.
જ્યારે બીજી બાજુ પ્રિયંકાએ કહ્યું હતું કે, મારુ નામ અધ્યક્ષ પદના ઉમેદાવારોની લિસ્ટમાં સામેલ ન કરવું. માનવામાં આવે છે કે, કર્ણાટકમાં પાર્ટીમાં થયેલી રાજકીય ઉથલપાથલના કારણે જ પાર્ટી અધ્યક્ષની પસંદગી કરવામાં વાર લાગી રહી છે. શશિ થરુરે કહ્યું, પ્રિયંકા અધ્યક્ષ પદ માટે દાવેદાર છે કે, નહીં તે ગાંધી પરિવાર નક્કી કરશે.
