દેવાની જાળમાં ફસાયેલા રિલાયન્સ ગ્રૂપના ચેરમેન અનિલ અંબાણીએ રિલાયન્સ કોમ્યુનિકેશન (આરકોમ)ના ડિરેક્ટર પદેથી રાજીનામું આપી દીધું છે. અનિલ અંબાણી ઉપરાંત છાયા વિરાની, રાયના કરાની, મંજરી કક્કડ અને સુરેશ રંગચરે પણ તેમના હોદ્દા પરથી રાજીનામું આપ્યું છે.
CFO એ ઓક્ટોબરમાં રાજીનામુ આપી ચુક્યા છે
આરકોમે BSE ને માહિતી આપી હતી કે ડિરેક્ટર અને CFO ના હોદ્દા પરથી શ્રી મણિકાંત વી એ ગત મહિને જ રાજીનામુ આપી ચુક્યા છે. આ તમામના રાજીનામા કંપનીની કમિટી ઓફ ક્રેડિટર્સ સમક્ષ રજૂ કરવામાં આવશે. અનિલ અંબાણી, છાયા વિરાની અને મંજરી કાકેરે 15 નવેમ્બરે રાજીનામુ આપ્યું છે જ્યારે રાયના કારાનીએ 14 નવેમ્બર અને સુરેશ રંગાચરે 13 નવેમ્બરે રાજીનામુ આપ્યું હતું.
જુલાઈ-સપ્ટેમ્બર ત્રિમાસિક ગાળામાં રૂપિયા 30,142 કરોડનું નુકસાન થયું
શુક્રવારે રિલાયન્સ કોમ્યુનિકેશનના ત્રીજા ત્રિમાસીક ગાળાના પરિણામ આવી ગયા છે. ન્યૂઝ એજન્સી પીટીઆઈના જણાવ્યા પ્રમાણે જુલાઈ-સપ્ટેમ્બરના ત્રિમાસીક ગાળામાં કંપનીને રૂ. 30,142 કરોડનું નુકસાન થયું છે. દેવાળિયા પ્રક્રિયામાં ચાલતી કંપનીએ ગયા વર્ષે સમાન ત્રિમાસીક ગાળામાં રૂ. 1,141 કરોડનો નફો કર્યો હતો. જ્યારે આ ત્રિમાસીક ગાલામાં કંપનીની આવક ઘટીને 302 કરોડ થઈ ગઈ છે, જે ગયા વર્ષે સમાન ગાળામાં રૂ. 977 કરોડ હતી. શેરબજારમાં પણ હાલ આરકોમના શેરની કિંમત માત્ર 59 પૈસા રહી છે.
એજીઆરની લપેટમાં આરકોમ
ત્રિમાસીક પરિણામોમાં જણાવવામાં આવ્યું છે કે,સુપ્રીમ કોર્ટે કોમ્યુનિકેશન કંપનીઓની વાર્ષિક એડજસ્ટેડ ગ્રોસ રેવન્યુ (AGR)ની ગણતરીના નિર્ણયને ધ્યાનમાં રાખીને કંપનીને રૂ. 28,314 કરોડની જોગવાઈ કરી આપી છે. આરકોમના કુલ દેવામાં રૂ. 23,327 કરોડ રૂપિયાની લાઈસન્સ ફી અને રૂ. 4,987 કરોડની સ્પેક્ટ્રમ ફી પણ સામેલ છે.
ચીનની બેન્કોએ કેસ દાખલ કર્યો
આરકોમના માલિક અનિલ અંબાણી પર ચીનની ત્રણ મોટી બેન્કોએ લંડન કોર્ટમાં 680 મિલિયન ડોલર (અંદાજે 47,600 કરોડ) નહીં ચૂકવવાનો કેસ દાખલ કર્યો છે.આ ત્રણેય બેન્ક- ઈન્ડસ્ટ્રિયલ એન્ડ કોમર્શિયલ બેન્ક ઓફ ચાઈના લિમિટેડ, ચાઈના ડેવલપમેન્ટ બેન્ક અને એક્સપોર્ચ-ઈમ્પોર્ટ બેન્ક ઓફ ચાઈના છે. બ્લૂમબર્ગના રિપોર્ટ પ્રમાણે બેન્કોએ દાવો કર્યો છે કે, અનિલ અંબાણીની અંગત ગેરંટીની શરત પર રિલાયન્સ કોમ્યુનિકેશન (આરકોમ)ને 2012માં 92.52 કરોડ ડોલર (અંદાજે 65 હજાર કરોડ)નું ધિરાણ આપવામાં આવ્યું હતું. ત્યારે અનિલ અંબાણીએ આ લોનની પર્સનલ ગેરંટી લેવાની વાત કરી હતી પરંતુ ફેબ્રુઆરી 2017 પછી કંપની લોન ચૂકવવામાં ડિફોલ્ટ થઈ હતી.
