અમદાવાદના કાગડાપીઠ પોલીસ સ્ટેશનમાં ગત રાત્રે એક યુવકે લોકઅપમાં ચાદર વડે ગળે ફાંસો ખાઈને આત્મહત્યા કરી લીધી છે. પરિવારજનોએ આ અંગે પોલીસ દ્વારા યુવકને માર મારવામાં આવ્યો હોવાનો આક્ષેપ કર્યો છે. લોકઅપમાં યુવકે ગળેફાંસો ખાઈ લીધો ત્યારે પોલીસને ખબર પણ ના પડી તે અંગે અનેક સવાલો ઉભા થયા છે.
બહેરામપુરા ખાતે હિરાલાલની ચાલીમાં રહેતા જીગર સોલંકીની કાગડાપીઠ પોલીસ દ્વારા બોલાચાલીના કેસમાં સીઆરપીસી 151 હેઠળ અટકાયત કરાઈ હતી અને પોલીસે લોકઅપમાં રાખ્યો હતો. રાત્રે જીગરનો ભાઈ તેને જમવાનું આપી ગયો હતો. જમ્યા બાદ 11 વાગ્યા આસપાસ તેણે ચાદર વડે ફાંસો ખાધો હતો. પ્રાપ્ત વિગતો મુજબ પહેલા પ્રયાસમાં તેના પગ નીચે જમીનને અડી ગયા હતા ત્યારબાદ તેણે ફરી ચાદરને ઊંચે બાંધી લોકઅપમાં ફાંસો ખાઈ આત્મહત્યા કરી લીધી હતી. લોકઅપમાં જ યુવકે આત્મહત્યા કરી લેતા પોલીસ બેડામાં ભાગદોડ મચી ગઈ છે. જીગરના પરિવારનું કહેવું છે કે તેને કેમ પોલીસ ઉઠાવી લાવી, તેની સામે કોને ફરિયાદ કરી, કેવી રીતે આ બનાવ બન્યો તે બાબતે પોલીસે કોઈ જવાબ આપ્યો નથી. તેના શરીર પર પોલીસે માર માર્યો હોવાના નિશાન છે.
