દમણ કોસ્ટલ પોલીસે કડૈયાના દરિયા પાસેથી બુધવારે એક શંકાસ્પદ બોટને પકડી પાડી હતી. ગેરકાયદે ફિશિંગ કરવા માટે ઉપયોગમાં લેવાય રહી હોય તેવી પ્રાથમિક શંકા સેવાઈ છે. જોકે, હાલના સંજોગો જોતા આ બોટ કોઈ અપરાધી પ્રવૃત્તિ માટે તો ઉપયોગમાં લેવાની હતી કે કેમ તે પણ ચકાસવામાં આવી રહ્યું છે. દમણ કોસ્ટલ પોલીસનું કહેવું હતું કે, મંગળવારે મોડી સાંજે દરિયામા ૩ નોટીકલ માઈલ દૂર પોલીસ પેટ્રોલિંગ કરી રહી હતી. તે સમયે આ બોટ નજરમાં આવી હતી. પ્રાથમિક રીતે બોટને જોતા તે સંદિગ્ધ લાગી હતી. પોલીસે બોટ પર સવાર ૫ ખલાસીઓની પુછપરછ પણ શરૂ કરી હતી. આ સાથે જ બોટ પર કોઈપણ પ્રકારનો રજીસ્ટ્રેશન નંબર કે નામ પણ ન હતું. ખલાસીઓની પુછપરછ કરતા તેમણે બોટ વલસાડની હોવાનું જણાવ્યું હતું. પોલીસે આ કેસને દમણ મત્સ્ય વિભાગને સોંપતા હાલ દમણ મત્સ્ય વિભાગે આ બોટ કોની માલિકીની છે. આ પ્રમાણે રજીસ્ટ્રેશન વગર અને નામ વગર દમણના દરિયા કિનારે શા માટે ફિશીંગ કરી રહી હતી એ દિશામા તપાસ હાથ ધરી છે.
