વડાપ્રધાન તરીકે બીજી ઇનિંગ્સની શરુઆત કરતા વડાપ્રધાન નરેન્દ્ર મોદી પોતાની પહેલી વિદેશ યાત્રા કરતા માલદીવ પહોંચ્યા છે. કેરળમાં આયોજીત કાર્યક્રમને સંબોધન કર્યા પછી તેઓ માલદીવ માટે નીકળ્યા હતા. તેમની આ યાત્રા ભારતની ‘પડોસી પહેલા’ની નીતિને આપવામાં આવતુ મહત્વ દર્શાવે છે.
જો કે, વડાપ્રધાન નરેન્દ્ર મોદી માલદીવ પહોંચે એ પહેલા માલદીવ સરકારે રાષ્ટ્રના ખાસ સર્વોચ્ચ સન્માન ‘રુલ ઓફ નિશાન ઇજ્જુદ્દીન’થી નવાજવાની જાહેરાત કરી હતી. માલદીવના વિદેશ મંત્રી અબ્દુલ્લા શાહિદે ટ્વીટ કરીને આ અંગેની જાણકારી આપી હતી. તેમણે ટ્વીટ કરી હતી કે,‘વડાપ્રધાન નરેન્દ્ર મોદીને દેશના સર્વોચ્ચ સન્માનથી નવાજવાનો નિર્ણય કરવામાં આવ્યો છે.’ આટલું જ નહી તેમણે પીએમ મોદીના આગમન પહેલા ટ્વીટર પર ‘નમસ્કાર, સ્વાગતમ’ પણ લખ્યું હતું.
માલદીવના એરપોર્ટ પર પહોંચતા જ વિદેશ મંત્રી અબ્દુલ્લા શાહિદે વડાપ્રધાન નરેન્દ્ર મોદીનું સ્વાગત કર્યું હતું. ઉલ્લેખનીય છે કે વડાપ્રધાન નરેન્દ્ર મોદીની આ યાત્રાનો મુખ્ય હેતુ હિન્દ મહાસાગર દ્રીપસમૂહ સાથે સંબંધો વધારે મજબૂત કરવાનો છે.
