સંયુક્ત રાષ્ટ્રમાં ભારતના સૌપ્રથમ પ્રતિકાત્મક પ્રયાસના ભાગરૃપે વડાપ્રધાન નરેન્દ્ર મોદી આગામી સપ્તાહે વૈશ્વિક સંસ્થાની મુલાકાત દરમિયાન તેના મુખ્યાલયમાં ૫૦ કીલો વોટના ‘ગાંધી સોલાર પાર્ક’નું ઉદ્ધાટન કરશે. આ ગાંધી પાર્ક ક્લાઈમેટ ચેન્જ મુદ્દે ભારતના નક્કર પ્રયાસોની ઝાંકી રજૂ કરે છે.
દરમિયાન અમેરિકાના એક સપ્તાહના પ્રવાસે રવાના થતાં પહેલાં વડાપ્રધાન મોદીએ કહ્યું કે તે અમેરિકન પ્રમુખ ડોનાલ્ડ ટ્રમ્પ સાથે મુલાકાતની આતુરતાથી રાહ જોઈ રહ્યા છે. સંયુક્ત રાષ્ટ્રની છત પર લગાવવામાં આવેલી સૌર પેનલ્સ ભારતે ભેટમાં આપી છે. આ પેનલ્સ ૧૦ લાખ ડોલરના ખર્ચે તૈયાર થઈ છે.
મોદી ૨૪મી સપ્ટેમ્બરે ગાંધીજીની ૧૫૦મી જન્મ જયંતિની ઊજવણીના ભાગરૃપે એક વિશેષ કાર્યક્રમમાં સંયુક્ત રાષ્ટ્રના મુખ્યાલયમાં રીમોટથી સોલાર પાર્ક અને ‘ગાંધી પીસ ગાર્ડન’નું ઉદ્ધાટન કરશે.
દરમિયાન અમેરિકાના એક સપ્તાહના પ્રવાસે રવાના થતા પહેલાં વડાપ્રધાન નરેન્દ્ર મોદીએ એક પછી એક નવ ટ્વીટ કરી અને કહ્યું કે આ પ્રવાસમાં ભારત-અમેરિકાના સંબંધો વધુ મજબૂત થશે. અમેરિકાના પ્રવાસ પર સમગ્ર દુનિયાના નેતાઓને મળવાની તક મળશે.
મોદી આ પ્રવાસના એક જ સપ્તાહમાં ટ્રમ્પ સાથે બે વખત મુલાકાત કરશે. ૨૨મી સપ્ટેમ્બરે હાઉડી મોદી કાર્યક્રમમાં ટ્રમ્પ અને મોદીની પહેલી મુલાકાત થશે તેમજ સંયુક્ત રાષ્ટ્રની સાધારણ સભા વખતે ૨૪મી સપ્ટેમ્બરે ટ્રમ્પ-મોદી દ્વિ-પક્ષીય વાટાઘાટો માટે મળશે.
