જમ્મુ કશ્મીરના કિસ્તવાડ શહેરની સેમિના કોલોનીમાં વૉટર ફિલ્ટરેશન પ્લાન્ટ પર ચોકી કરી રહેલા બે સિક્યોરિટી જવાન પર અજાણ્યા લોકોએ રવિવારે રાત્રે ગોળીબાર કરતાં બંને જવાનોને ઇજા થઇ હતી.
આ ગોળીબાર કરનારાનો હેતુ શો હતો એ સ્પષ્ટ થયું નહોતું પરંતુ આ ઘટના બનતાં સિક્યોરિટી દળોએ તરત આખા વિસ્તારને ઘેરી લીધો હતો. આતંકવાદીઓ પીવાના પાણીના આ ફિલ્ટરેશન પ્લાન્ટ સાથે ચેડાં કરવા માગતાં હોય એવી શંકા પણ વ્યક્ત કરાઇ હતી.
ઇજાગ્રસ્ત જવાનોને હૉસ્પિટલમાં સારવાર આપી રહેલા ડૉક્ટરોએ કહ્યું હતું કે બંને જવાનો ખતરાની બહાર છે.
અત્રે એ નોંધનીય છે કે છેલ્લા ત્રણ દાયકાથી આતંકવાદી પ્રવૃત્તિમાં સક્રિય એવા હિઝબુલ મુજાહિદ્દીનના નેતા જહાંગીર સરુરીનું મકાન સુનાર બાડી અને ટંગબાડીની વચ્ચે છે અને આ વિસ્તારમાં સેમિના કોલોનીમાં ફિલ્ટરેશન પ્લાન્ટ આવેલો છે. જમ્મુ કશ્મીરમાં આતંકવાદ શરૂ થતાંની સાથે જહાંગીર તરત હરકતમાં આવ્યો હતો અને આતંકવાદી હુમલાઓમાં અગ્રેસર હતો.
